Rom 14 | MEU | STEP | Ena abidadama e manoka-manokamu tauna na bavabia dae, to basio hepapahuahu.

Romans 14

Hahegoada herevadia

1 Ena abidadama e manoka-manokamu tauna na bavabia dae, to basio hepapahuahu. 2 Ta be mai ena abidadama, bena ḡau iboudiai e animu; ma ta lalona e manokamu, bena uma ḡaudia mo e animu. 3 E animu tauna ese se animu tauna basine dadaraia; bona se animu tauna ese e animu tauna basine hahemaoro henia: badina be Dirava ese vada e abia dae. 4 Oi be daika, tau ta ena hesiai tauna o hahemaoro heniamu? Biaguna vairanai baine gini, eiava baine keto. Ia na baine gini, badina be Lohiabada na mai siahuna baine haginia.

5 Tau ta e tomamu dina ta be herea; ma tau ta e tomamu dina iboudiai be heḡereḡere. Ta ta ese lalodia bae hadai ḡoevaḡoeva. 6 Dina e laloamu tauna na Lohiabada enai e laloamu. E anianimu tauna na Lohiabada enai e anianimu, badina be ia ese Dirava e hanamoamu; bona se anianimu tauna na Lohiabada enai se anianimu, bona ia ese danu Dirava e hanamoamu. 7 Asi tauna ta sibona enai e maurimu, bona asi tauna ta sibona enai e masemu. 8 Ta maurimu be Lohiabada enai ta maurimu; bona baita mase, Lohiabada enai baita mase. Taunabunai, ta maurimu eiava baita mase, ita na Lohiabada ena. 9 Ina dainai Keriso e mase bona e mauri lou, mase taudia bona mauri taudia biagudia ai bainela totona.

10 A oi, dahaka dainai varavaramu o hahemaoro heniamu? Dahaka dainai o dadaraiamu? Badina be ita iboudai Dirava ena hahemaoro gabuna vairanai baita gini. 11 Buka ai e torea heḡereḡerena eto, Lohiabada eto “Egu mauri dainai tui iboudiai lau vairagu ai bae hadai, bona mala iboudiai ese Dirava bae imodaia”. 12 Taunabunai, ita iboudai ta ta ena kara ena kara Dirava vairanai baita hahedinarai.

13 Taunabunai, basita hahemaoro heheni, a laloda ini baita hadai toma: varavarada ena dala ai hekwakwanai ḡauna eiava idoa basita atoa. 14 Lohiabada Iesu ese vada e hamaorogu dainai lau na dibagu ḡau ta dikana basina gwauraia. A ta ese ḡau ta dikana baine gwauraia, una ḡau na dika ienai. 15 Bena amu aniani ḡauna dainai varavaramu lalona e hekwakwanaimu, oi na uraheni dalana ai to rakamu. Keriso ese ia dainai e mase; oi ese amu aniani dainai basio hamasea. 16 Oi ese namona o laloamu ḡauna dikana basie gwauraia. 17 Badina be Dirava ena basileia na dia aniani ḡauna eiava inuinu ḡauna; a kara maoromaoro bona maino bona moale, Lauma Helaḡa bagunai. 18 Badina be ini ḡau amo Keriso isiaina e lao henimu tauna na Dirava ese e lalo namo heniamu, bona taunimanima ese e hanamoamu.

19 Benaini, maino daladia baita tahu, bona baita hahegoada heheni. 20 Dirava ena ḡaukara basio hadikaia, aniani ḡauna dainai. Momokani, ḡau iboudiai na goḡoeva-gogoeva; to mai daradarana baine aniani tauna ana aniani na dika ienai. 21 Vamu basita ania, vine ranuna basita inua, bona varavarada ihahekwakwanaina karana ta basita karaia, unu hari namo. 22 Oi na mai emu abidadama, ani? Dirava bavabidadama henia. Sibona dikana se gwauraiamu ena kara dainai, una tau na namo. 23 A daradara tauna baine aniani, sibona baine hahedika, badina be asi ena abidadama; bona abidadama ese se havara ḡaudia iboudiai na didika.